भूभून बचल त लोल फूटल
रिपोर्टर - मंत्री जी रोहतास में पब्लिक के काहे आतना गुस्सा आ गइल कि राउर लोल फोर देलस,पुरा घटना के विस्तार से बताईं ?
मंत्री जी - आरे का कहीं, बिहार के जनता हमरा से अतना प्यारे करेला कि हम का बताईं। हमारा के देखे खातिर आ हमार गाना सुने खातिर पूरा रोहतास उखड़ के आ गईल रहे। उ का हऽ कि ताराचंडी धाम पर सोमार रात के काला एवं संस्कृति विभाग के फंड से एगो सांस्कृतिक कार्यक्रम के आयोजन करावत रहनी ह ताले भीड़ हमरा के देखे खतिर तुड़ा के अनियंत्रित होगईल आ धक्का-मुक्की शुरू कर देलस। अब का कहीं की बेकाबू भीड़ के नियंत्रित करे खातिर पुलिस लाठीचार्ज कर देलस ओकरा बाद जनता भी नरभसा गईल आ पथराव शुरू कर देलस, जेमें कुछ लोग के भुभुन फूटल,केहू के लिलार आ ओही में हमार लोल फूट गइल।
रिपोर्टर - मंत्री जी खबर आ रहल बा कि सरकारी फंड से जौन लाउड स्पिीकर आइल रहे ओकर खराब आवाज से खिसिया के लोग दशहारा में रावण फूंके के जगह राउर गाडि़ये फुंक देहलस ?
मंत्री जी - अब का बताईं रउआ जानते बानी सरकारी समान के हाल साउंड सिस्टम त ऐतना खराब रहे कि केहू के भी गुस्सा आ जाई बाकि जनता से हमरा एगो शिकायत बा कि अगर रावण ना मिलल त हमार गाड़ी काहे फुंकल लोग उ हमार सवारी रहे रावण के ना। गाड़ी जले के दुख आतना नईखे काहे कि सरकारी कोटा के गाड़ी रहे फेंर दोसर मिल जाई बाकि उ लोग हमार कागज जड़ा देहल इ ठीक ना भईल। ओमें हमार कई गो गाना भी लिखल रहे।
रिपोर्टर - खबर बा कि जनता के प्यार से बचे खातिर रउआ स्टेज के नीचे लुका गइल रहनी,कइसन लागल ओह घड़ी ?
मंत्री जी - लईकाईं के ईयाद आ गईल.. लईकाई में हमनी के लुकाछिपी खेलले बानी..रउओ खेलले होखब..ओमे हमनी के ऐही तरह चउकी के नीचे,पलंग के नीचे,भूसउल में घूस के लुका जात रही आ जे चोर रहे से खोजे...बाकि प्यार पर उतारू भीड़ द्वारा हमरा वाहन पर पेट्रोल डालके आग लगा दिए जाने से गाड़ी में रखल हमर बैग जरके नष्ट हो गइल। आक्रोशित भीड़ से बचे खातिर हम लकड़ी से बनल मंच के नीचे छिप गइनी। तब जाके हमार जान बचल।
रिपोर्टर - एक जगह ना दू दू जगह राउर अइसने स्वागत भइल बा ऐकरा पीछे का कारण बा ?
मंत्री जी - जनता के मन में हमार अथाह प्यार बा,जनता हमरा के निर्दलीय नेता बनवले बा ऐही वजह से जहाँ हम जाइले ओही जगह भगद्दर मच जाला। जनता से अतने अपील करे के बा कि अइसन प्यार देके हमरा पेट पर लात मत मारी
रिपोर्टर - त इ रहलें ह बिहार के काला संस्कृति मंत्री श्री किनय बिहारी जी,इनका के जनता के अतना प्यार मिलता कि इनकर आत्मा काँप गइल बा,,अब ई भगवान से मनावत होईहें कि अब कौनों प्रोग्राम में साउंड सिस्टम खराब मत होखे ना त अबकि त बच गइनी पाता ना अगिला बेर का का फूटी।
लव कान्त सिंह
टिप्पणियाँ
एक टिप्पणी भेजें